Anglo-Norman Correspondence Corpus

Letter: Royal-011

Sender:King Edward II of England
Addressee:Richard Kellawe, bishop of Durham
Date:1316
 
Sample:Registrum Palatinum Dunelmense, Rolls Society,
Volume:Vol. IV
Page:495



Edward, etc. Al honurable pere, etc. Come par reson de vostre novele creacion en evesqe de Duresme vous soiez tenuz a nostre chier clerc Thomas de la Novele Haye en une annuele empension, tauntqe vous lui eiez purveu de covenable benefice de seinte Eglise, le quel Thomas nous vous nomasmes a la dite grace, solonc le droit de nostre coroune qe a nous appartient en cele partie, e ja soit ce qe plusurs benefices covenables appurtenauntes a vostre doneison, cest asavoir, lercediakene de Northuhumbreland, leglise de Seggefeld e une provende en leglise de Derlyngton soi soient voidez puis qe nous vous rendismes vostre temporaute, e qe nous vous eioms plusores foiz priez e maundez par lettres de nostre graunt seal e de nostre prive seal ausint qe nostre dit clerc feissez avauncer au primer benefice covenable qe se voidroit de vostre patronage solonc le droit de nostre coroune avantdite. Nepurquant ne li avez volu purveer jusqes en cea de nul des benefices avauntditz en prejudice de meisme nostre droit, desobeissance de noz ditz mandementz e arrerissement del avancement nostre clerc susdit, de quoi nous nous merveilloms durement e sumes molt esnoiez, desicome vous estes tenuz a garder e meyntenir le droit de nostre corone, ne mye tant soulement par vostre foiaute, mes par le serrement que vous feistes quant vous estoiez jurez de nostre consail e nous eoms ja entenduz qil y ad une provande voide en leg1ise de Aukeland par la mort Johan de Berewyk, la quele appartient a vostre doneison, vous prioms e chargeoms fermement enjoignant en la foy e lamur qe vous nous devez qe a meisme la provande avauncez nostre dit clerc e nous envoiez la collacion dy cele a son oeps par le portour de cestes sanz nule manere de delay, toutes excusacions lessez, issint qil ne coveigne mye qe, pur sauver nostre dit roial en cele partie, nous mettoms autre remedie par vostre defaute. Done, etc.
Hold the cursor over a tag to view its description or view the full tagset.


Edward, etc. Al honurable pere, etc. Come par reson de vostre novele creacion en evesqe de Duresme vous soiez tenuz a nostre chier clerc Thomas de la Novele Haye en une annuele empension, tauntqe vous lui eiez purveu de covenable benefice de seinte Eglise, le quel Thomas nous vous nomasmes a la dite grace, solonc le droit de nostre coroune qe a nous appartient en cele partie, e ja soit ce qe plusurs benefices covenables appurtenauntes a vostre doneison, cest asavoir, lercediakene de Northuhumbreland, leglise de Seggefeld e une provende en leglise de Derlyngton soi soient voidez puis qe nous vous rendismes vostre temporaute, e qe nous vous eioms plusores foiz priez e maundez par lettres de nostre graunt seal e de nostre prive seal ausint qe nostre dit clerc feissez avauncer au primer benefice covenable qe se voidroit de vostre patronage solonc le droit de nostre coroune avantdite. Nepurquant ne li avez volu purveer jusqes en cea de nul des benefices avauntditz en prejudice de meisme nostre droit, desobeissance de noz ditz mandementz e arrerissement del avancement nostre clerc susdit, de quoi nous nous merveilloms durement e sumes molt esnoiez, desicome vous estes tenuz a garder e meyntenir le droit de nostre corone, ne mye tant soulement par vostre foiaute, mes par le serrement que vous feistes quant vous estoiez jurez de nostre consail e nous eoms ja entenduz qil y ad une provande voide en leg1ise de Aukeland par la mort Johan de Berewyk, la quele appartient a vostre doneison, vous prioms e chargeoms fermement enjoignant en la foy e lamur qe vous nous devez qe a meisme la provande avauncez nostre dit clerc e nous envoiez la collacion dy cele a son oeps par le portour de cestes sanz nule manere de delay, toutes excusacions lessez, issint qil ne coveigne mye qe, pur sauver nostre dit roial en cele partie, nous mettoms autre remedie par vostre defaute. Done, etc.

Choose Letter