Anglo-Norman Correspondence Corpus

Letter: Royal-046

Sender:King Edward I of England
Addressee:Walter Langton, Bishop of Chester and Treasurer
Date:12 May 1298
 
Sample:Registrum Palatinum Dunelmense, Rolls Society
Volume:Vol. F
Page:230



Edward par la grace de dieu roi Dengleterre seignour Dirlaunde et Ducs Dacquitaigne al honurable peere en dieu Wauter par la mesme grace Evesque de Cestre son tresourier saluz. Nostre feal et loial Reynaud de Carey nous ad ja mandez par ses lettres lesqueles nous vous enveoms encloses denz cestes qe de eslirre pur nostre guerre Descoce quatre centz hommes de pie des terres de le conte de Garenne de Bromfeud et de Yal ne des M. hommes de pie du contee de Cestre nul mandement ne li est venu sicome il estoit autrefoiz ordenez, et nous sur ce li avums remandez par nos lettres endroit de ceux de Bromfeud et de Yal qe nostre volunte est pur certeine reson, qe le seneschal et le Baillif le conte celes parties les face venir a nous. Mais des M. hommes de pie de Cestreshire dont il nous ad mandez, voloms quil les eslise et enveiye a nous sicome il fut autrefois ordenez. E voloms ausint quil eslise de ceux de Lancastreshire aucun covenable nombre de gent de pie solonc sa discrecion. Et quil les meinge ove les autres. E toutes ces choses li avoms nous mandees orendroit. Et vous mandoms que vous facez les dites choses mettre en oevre hastivement en la manere desusdite et qe vous vous li en certifiez pleinement et sanz delay et qe sur ce li facez avoir tieu pouair et tieu garant come mestiers est. E du paement ordenez aussi come vous avez fait des autres. Et de toutes ces choses nous facez savoir vostre response par vos lettres et par le portour de cestes. Done souz nostre prive seal a Telforde le xij jour de May lan de nostre regne vint et sisisme.
Hold the cursor over a tag to view its description or view the full tagset.


Edward par la grace de dieu roi Dengleterre seignour Dirlaunde et Ducs Dacquitaigne al honurable peere en dieu Wauter par la mesme grace Evesque de Cestre son tresourier saluz. Nostre feal et loial Reynaud de Carey nous ad ja mandez par ses lettres lesqueles nous vous enveoms encloses denz cestes qe de eslirre pur nostre guerre Descoce quatre centz hommes de pie des terres de le conte de Garenne de Bromfeud et de Yal ne des M. hommes de pie du contee de Cestre nul mandement ne li est venu sicome il estoit autrefoiz ordenez, et nous sur ce li avums remandez par nos lettres endroit de ceux de Bromfeud et de Yal qe nostre volunte est pur certeine reson, qe le seneschal et le Baillif le conte celes parties les face venir a nous. Mais des M. hommes de pie de Cestreshire dont il nous ad mandez, voloms quil les eslise et enveiye a nous sicome il fut autrefois ordenez. E voloms ausint quil eslise de ceux de Lancastreshire aucun covenable nombre de gent de pie solonc sa discrecion. Et quil les meinge ove les autres. E toutes ces choses li avoms nous mandees orendroit. Et vous mandoms que vous facez les dites choses mettre en oevre hastivement en la manere desusdite et qe vous vous li en certifiez pleinement et sanz delay et qe sur ce li facez avoir tieu pouair et tieu garant come mestiers est. E du paement ordenez aussi come vous avez fait des autres. Et de toutes ces choses nous facez savoir vostre response par vos lettres et par le portour de cestes. Done souz nostre prive seal a Telforde le xij jour de May lan de nostre regne vint et sisisme.

Choose Letter